ភ្នំពេញ៖ ធនាគារអភិវឌ្ឍន៍អាស៊ី (ADB) បានអនុម័តផ្ដល់ប្រាក់កម្ចីក្នុងទំហំទឹកប្រាក់ ២៧លានដុល្លារ និងជំនួយ ៥,៥លានដុល្លារដល់រដ្ឋាភិបាលកម្ពុជា ក្នុងការសាងសង់ និងបំពាក់បរិក្ខារសុខាភិបាល ក៏ដូចជាបង្កើនលទ្ធភាពទទួលបានសេវាសុខាភិបាលប្រកបដោយគុណភាពនៅក្នុងខេត្តបន្ទាយមានជ័យ។

សេចក្ដីប្រកាសព័ត៌មានរបស់ ADB កាលពីថ្ងៃទី២០ ខែតុលា ឆ្នាំ២០២២ ឱ្យដឹងថា ADB បានអនុម័តហិរញ្ញប្បទានចំនួន ៣២,៥លានដុល្លារ ដើម្បីបង្កើនលទ្ធភាពទទួលបានសេវាសុខាភិបាលប្រកបដោយគុណភាពនៅក្នុងខេត្តបន្ទាយមានជ័យដែលជាខេត្តជាប់ព្រំដែននៅភាគពាយព្យនៃប្រទេសកម្ពុជា និងជាតំបន់ដែលពលរដ្ឋចំណាកស្រុកចាកចេញ និងត្រឡប់មកវិញព្រមទាំងជាទីតាំងសម្រាប់អ្នកដែលស្វែងរកការងារធ្វើនៅតំបន់សេដ្ឋកិច្ចពិសេសរបស់ខេត្ត។

សេចក្ដីប្រកាសព័ត៌មានដដែលឱ្យដឹងថាក្រោម «គម្រោងសុខភាពតំបន់ព្រំដែនមហាអនុតំបន់ទន្លេមេគង្គ (GMS)» កម្ពុជានឹងពង្រីកការគ្របដណ្តប់ និងការថែទាំសុខភាពសម្រាប់ពលករចំណាកស្រុកស្ថិតក្នុងតំបន់ដែលសេវានៃប្រព័ន្ធសុខាភិបាលក្នុង និងក្រៅប្រទេសមិនទាន់ទៅដល់ក៏ដូចជានៅតាមតំបន់ព្រំដែនដែលជនចំណាកស្រុកឆ្លងកាត់ និងរស់នៅជាដើម។

គួរឱ្យដឹងថាគម្រោងនេះនឹងបង្កើនកម្ចីសម្បទានចំនួន ២៧លានដុល្លារ និងជំនួយរហូតដល់ ៥,៥លានដុល្លារដល់រាជរដ្ឋាភិបាលកម្ពុជាដើម្បីសាងសង់ និងបំពាក់បរិក្ខារសុខាភិបាលនៅតាមតំបន់ព្រំដែន។ ក្នុងនោះគឺការពង្រីកកិច្ចគាំពារហិរញ្ញវត្ថុលើការថែទាំសុខភាព និងពង្រឹងប្រព័ន្ធនៃការផ្តល់សេវាសុខាភិបាលឆ្លងកាត់ព្រំដែន ក៏ដូចជាការបង្កើតឱ្យមានកំណត់ត្រាសុខភាពអេឡិចត្រូនិកចល័តសម្រាប់ជនចំណាកស្រុកផងដែរ។

យ៉ាងណាមិញ មន្ត្រីជំនាញជាន់ខ្ពស់ផ្នែកសង្គមរបស់ ADB ប្រចាំតំបន់អាស៊ីអាគ្នេយ៍ លោក Rikard Elfving បានគូសបញ្ជាក់ថា កិច្ចសហប្រតិបត្តិការនេះនឹងជំរុញកំណើនសេដ្ខកិច្ចក្នុងប្រទេស ក៏ដូចជាឱកាសការងារដែលប្រសើរមួយដល់ពលករចំណាកស្រុកផងដែរ។

លោកថា៖ «កិច្ចសហប្រតិបត្តិការ និងសមាហរណកម្មតំបន់ នៅទូទាំង មហា អនុតំបន់មេគង្គបាន ជំរុញ កំណើនសេដ្ឋកិច្ច ក៏ដូចជាការចល័តរបស់មនុស្សកាន់តែ ច្រើន ដើម្បីស្វែងរកការងារ និងឱកាសកាន់តែប្រសើរ។ វាក៏បានបង្កជាបញ្ហាប្រឈមផ្នែកសុខភាពដែលទាក់ទងនឹងការចល័តរបស់មនុស្សសម្រាប់តំបន់ព្រំដែនដែលភ្ជាប់ទៅនឹងច្រករបៀងសេដ្ឋកិច្ចសំខាន់ៗ»។

លោកបន្តថា៖ «គម្រោងសុខភាពតំបន់ព្រំដែនមហាអនុតំបន់ទន្លេមេគង្គនេះ នឹងផ្អែក លើបទពិសោធន៍របស់ ADB ក្នុងការគាំទ្រកម្មវិធីគ្រប់គ្រងជំងឺឆ្លង ហើយនឹងរួមបញ្ចូលមេរៀន ពីការឆ្លើយតប និងការស្តារឡើងវិញរបស់ កម្ពុជាពីជំងឺរាតត្បាតកូវីដ-១៩»។

យោងតាមរបាយការណ៍របស់ ADB បានឱ្យដឹងថា ប្រព័ន្ធសុខាភិបាលនៅតាមតំបន់ព្រំដែន គឺពុំទាន់មានលក្ខណៈគ្រប់គ្រាន់ដើម្បីអាចឆ្លើយតបទៅ នឹងបញ្ហាប្រឈមផ្នែកសុខភាពដែលទាក់ទងនឹងការចល័តរបស់មនុស្សនៅឡើយទេ៕